နို့တိုက်မိခင်တွေ ရင်သားအလှမပျက်ရအောင် လုပ်ပေးသင့်တဲ့ လေ့ကျင့်ခန်းများ
လေ့ကျင့်ခန်း လုပ်တာ၊ အာဟာရ မျှတအောင် စားတာက ကျန်းမာတဲ့ ဘဝနေထိုင်မှုပုံစံရဲ့ အရေးပါတဲ့ အစိတ်အပိုင်းပါ။ နို့တိုက်မိခင်တွေအတွက်ရော လေ့ကျင့်ခန်း လုပ်လို့ ရမလားဆိုတော့ ရပါတယ်။ ကိုယ်ဝန်ဆောင်ချိန်နဲ့ နို့တိုက်နေချိန်တွေမှာ ကိုယ်လက်လေ့ကျင့်ခန်းကို အသင့်အတင့် လုပ်ပေးလို့ ရပါတယ်။ ဒီတော့ ရင်သားအလှမပျက်ရအောင် လုပ်ဆောင်သင့်တဲ့ လေ့ကျင့်ခန်းလေးတွေကို ပြောပြပေးထားတာမို့ စာလေးကို ဖတ်ရင်း သေချာလေး လိုက်လုပ်ကြည့်လိုက်ဦးနော်။
မိခင်နို့တိုက်နေချိန်မှာ လေ့ကျင့်ခန်း လုပ်လို့ ရမလား?
မိခင်နို့တိုက်ချိန်မှာ လေ့ကျင့်ခန်း ပြင်းပြင်းထန်ထန်တွေ မဟုတ်ပေမယ့် ပေါ့ပေါ့ပါးပါး လေ့ကျင့်ခန်းလေးတွေ လုပ်ပေးလို့ ရပါတယ်။ မိခင်နို့တိုက်ချိန်မှာ လေ့ကျင့်ခန်း လုပ်တာက နို့ရည် ပမာဏ မပြောင်းလဲသလို အရသာလည်း မပြောင်းသလို နို့မှာပါတဲ့ အာဟာရဓာတ်လည်း မပြောင်းလဲပါဘူး။
မိခင်နို့တိုက်ချိန်မှာ ရင်သားအလှမပျက်ရအောင် လုပ်ဆောင်သင့်တဲ့ လေ့ကျင့်ခန်းများ
မိခင်နို့တိုက်ချိန်မှာ ရင်သားအလှမပျက်ရအောင် လုပ်ဆောင်သင့်တဲ့ လေ့ကျင့်ခန်းများကတော့
- Dumbbell Chest Press
ဒီလေ့ကျင့်ခန်း လုပ်ဆောင်ဖို့အတွက် ကြမ်းပြင်ပေါ်မှာ ဒါမှမဟုတ် ဖျာတစ်ချပ်ပေါ်မှာ လှဲလိုက်ပါ။ ပြီးရင် ဒူးနှစ်ဖက်ကို ထောင်ထားပြီး နိုင်လောက်တဲ့ အလေးတုံးလေး ၂ ခုကို ယူပါ။ ပြီးရင် မျက်နှာပေါ်ကို လက်ကို ဆန့်ရင်းအလေးတုံးလေးတွေကို မလို့ အပေါ်ကို ဆန့်ထုတ်ပေးပါ။ ၁၀ ခေါက်စီလောက် လုပ်ပေးပါ။
- Pushup လုပ်ပါ
လက်တွေနဲ့ ခြေထောက်တွေကို ပခုံးအကျယ်အတိုင်း ခွာပြီး ဒိုက်ထိုးဖို့ အသင့်အနေအထား နေပါ။ ပြီးရင်တော့ ခန္ဓာကိုယ်ကို မတ်မတ်ဖြောင့်ဖြောင့်လေး ထားပြီးတော့ ရင်ဘတ်ကို ကြမ်းပြင်နဲ့ ထိအောင် ကိုယ်ကိုညွှတ်လိုက် ကြမ်းကနေ ကိုယ်ကို ခွာလိုက်နဲ့ ၁၀ ကြိမ်လောက် လုပ်ပေးပါ။
- Dumbbell Fly
ဒီလေ့ကျင့်ခန်းကို လုပ်ဖို့အတွက် အလေးတုံးကို မလိုက်ပါ။ ခန္ဓာကိုယ်ကို မတ်တတ်အနေအထားကနေ အရှေ့ဘက်ကို ကိုင်းလိုက်ပါ။ ပြီးရင် ဘေးနှစ်ဖက်ဆီကို ဆန့်ထုတ်ပေးပါ။ လက်နှစ်ဖက်ကို အလယ်ကို စုလိုက် ဘေးကို ဆန့်ထုတ်လိုက် ၁၀ ကြိမ်လောက် လုပ်ပေးပါ။
- Dumbbell Inner Chest Press
ဒီလေ့ကျင့်ခန်း လုပ်ဖို့အတွက် ကြမ်းပြင်ပေါ်မှာ ဒါမှမဟုတ် ဖျာတစ်ချပ်ပေါ်မှာ လှဲလိုက်ပါ။ ပြီးရင် ဒူးနှစ်ဖက်ကို ထောင်ထားပြီး နိုင်လောက်တဲ့ အလေးတုံးလေး ၂ ခုကို ယူပါ။ ပြီးရင် မျက်နှာပေါ်ကို လက်ကို အလယ်မှာ စုပြီး အလေးတုံးလေးတွေကို မလို့ အပေါ်ကို ဆန့်ထုတ်ပေးပါ။ ၁၀ ခေါက်စီလောက် လုပ်ပေးပါ။
- Standing Press
ဒီလေ့ကျင့်ခန်း လုပ်ဖို့အတွက် ခန္ဓာကိုယ်ကို မတ်မတ်ရပ်ပါ။ ခြေထောက်ကို ပခုံးအကျယ်အတိုင်း ခွာထားပေးပါ။ တံတောင်ဆစ်တွေကို ၉၀ ဒီဂရီ ကွေးထားပါ။ လက်ဖျံ ၂ ခုကို ထိပေးလိုက် ခွာလိုက် ၁၀ ကြိမ်လောက် လုပ်ပေးပါ။
- Superman
ဒါကတော့ လွယ်ပါတယ်။ ကြမ်းပြင်မှာ ဖျာတစ်ချပ် ခင်းပြီး မှောက်ရက် အနေအထားနဲ့ နေပါ။ ပြီးရင် ခြေထောက် နှစ်ချောင်း နဲ့ လက်နှစ်ဖက်ကို ဆန့်ထုတ်လို့ ဗိုက်ကြွက်သားကို အားပြုရင်း လွတ်နိုင်သမျှ လွတ်အောင် မြှောက်ပါ။ ပြီးရင် ခဏလေး တောင့်ထားပြီး ပြန်ချပါ။ အသက်ကို မှန်မှန်လေး ရှူလို့လည်း မမေ့ပါနဲ့။
ဒီနေရာမှာ တစ်ခုသတိပေးချင်တာက နို့တိုက်မေမေတွေအနေနဲ့ လေ့ကျင့်ခန်း မလုပ်ခင်မှာ ဆရာဝန်နဲ့ အရင်တိုင်ပင်ဖို့ပါ။ ချုပ်ရိုး အခြေအနေ စိတ်ချရပြီဆိုမှ လေ့ကျင့်ခန်း စလုပ်ပေးပါ။
မွန်မွန်